USD
Қазақстан футбол федерациясы нидерландтық маман Джон ван’т Шкиппен ұлттық құраманың бас бапкері қызметіне қатысты келісімге келгенін хабарлады.
Федерация мәліметінше, маманның тағайындалуы ҚФФ Атқарушы комитетінің келісімінен кейін заңды түрде рәсімделеді. Комитет отырысы өткен соң тараптар ресми келісімшартқа қол қояды.
Джон ван’т Шкип ойыншылық мансабында Нидерландтың әйгілі «Аякс» және Италияның «Дженоа» клубтарының намысын қорғап, Нидерланд ұлттық құрамасында өнер көрсетті. 1988 жылы ұлттық команда сапында Еуропа чемпионы атанған.
Бапкерлік қызметін «Аякс» клубының жүйесінде бастаған ол кейін «Твенте», «Зволле», Мексиканың «Гвадалахарасы» және Аустралияның «Мельбурн Сити» клубтарын жаттықтырды. 2016 жылы «Мельбурн Ситимен» бірге Аустралия кубогын жеңіп алды.
Халықаралық деңгейде Джон ван’т Шкип Грекия мен Армения ұлттық құрамаларының бас бапкері болып жұмыс істеген.
Сонымен қатар Қазақстан ұлттық құрамасының жаңа бапкерлер құрамы да белгілі болды. Бас бапкердің көмекшілері қызметін Нұрбол Жұмасқалиев пен Елдос Ахметов атқарады. Қақпашылармен Юрий Новиков жұмыс істесе, дене даярлығына Вадим Боровский жауап береді. Ал сарапшы бапкер міндеті Тимур Құсайыновқа жүктелді.
