USD
Алдағы демалыс күндері Қазақстанның басым бөлігінде аптап ыстық сақталады. «Қазгидромет» РМК мәліметінше, ел аумағындағы ауа райына ауқымды антициклон ықпал етіп, жауын-шашынсыз әрі ыстық күндер басым болады.
Синоптиктердің болжамынша, демалыс күндерінің соңына қарай еліміздің батысы мен солтүстік-батысында ауа райы құбылады. Солтүстік-батыс циклонының әсерінен жаңбыр жауып, найзағай ойнайды, жел күшейеді. Кей жерлерде бұршақ түсуі де ықтимал.
Еліміздің шығыс өңірлерінде кезеңнің басында, сондай-ақ оңтүстік және оңтүстік-шығыстағы таулы аймақтарда барлық күндері жаңбыр жауып, найзағай болады деп күтілуде. Бұл өңірлерде ауа райына оңтүстік циклон әсер етеді.
Метеорологтардың мәліметінше, Иран аумағынан келетін жылы ауа массаларының әсерінен ауа температурасы айтарлықтай жоғарылайды. Солтүстік және шығыс облыстарда сынап бағаны 35–39 градусқа дейін көтерілсе, батыс пен орталық өңірлерде 36–41 градусқа дейін жетеді. Оңтүстікте де 35–41 градус аралығында өте ыстық ауа райы сақталады.
Мамандар тұрғындарға күннің ең ыстық уақытында ұзақ уақыт далада жүрмеуге, жеткілікті мөлшерде су ішуге және күн сәулесінен қорғану шараларын сақтауға кеңес береді.
