USD
Қазақстанда жылыту маусымына дайындық: кей өңірлерде жылу беріле бастады
Қазақстанда алдағы күз-қыс кезеңіне дайындық жұмыстары жалғасып жатыр. Үкімет отырысында Энергетика министрі Ерлан Ақкенженов елдегі энергетикалық нысандардың жағдайы, отын қоры және коммуналдық инфрақұрылымның дайындығы туралы баяндады.
Биылғы жылыту маусымы Павлодар облысында 14 қыркүйекте басталды. Ал солтүстік және шығыс өңірлерде жылу беру жүйесін 1 қазанға дейін іске қосу жоспарланған. Нақты мерзім ауа райының қалыптасуына байланысты белгіленеді.
Қысқы кезеңді тұрақты өткізу үшін энергетикалық нысандарда қажетті отын қоры жасақталған. Қазіргі таңда станцияларда 4,9 млн тонна көмір және 127 мың тонна мазут бар.
Энергетикалық нысандардағы жөндеу жұмыстары да жалғасуда. Бүгінде төрт энергоблок, 30 қазандық және 19 турбина жөндеуден өткізілді. Сонымен қатар 17 мың шақырым электр желісін жаңғырту аяқталған. Тағы тоғыз қосалқы станциядағы жұмыстар соңғы кезеңге жетті.
Жылу желілерінің республика бойынша дайындығы 97%-ды құрайды. Жоспарланған 377 шақырым желінің 366 шақырымы жөнделіп үлгерген.
Қазір биліктің ерекше бақылауында Ұлытау, Абай, Солтүстік Қазақстан және Ақмола облыстарындағы бірқатар нысан тұр.
Сәтбаев қаласында жылу магистралін қайта жаңғырту аяқталып, желілерді шаю және қысыммен сынау жұмыстары жүргізілуде. Петропавлдағы жылу магистральдарының дайындығы 95%-ға жетті, жұмыстарды апта соңына дейін аяқтау көзделген.
Степногорск қаласында жүйелердің дайындығы 76%-ды құрайды. Нысанды 25 қыркүйекке дейін пайдалануға беру жоспарланған. Ал Семейде үш жоба бойынша жұмыстардың орындалуы 70%-ға жетті. Қажетті сорғылар мен жылу алмастырғыштар 26 қыркүйекке дейін жеткізіледі деп күтілуде.
