USD
Қазақстан мен Қытай қауіпсіздік саласындағы екіжақты байланысты одан әрі нығайтуға ниетті. Келіссөздер барысында азаматтардың сапарын жеңілдететін маңызды уағдаластықтарға қол жеткізілді.
Қазақстанның Ішкі істер министрлігі таратқан ақпаратқа сәйкес, тараптар екі ел азаматтарының ұлттық жүргізуші куәліктерін өзара тану және оларды айырбастау мәселесі бойынша келісімге келген.
Бұл бастама Қазақстан мен Қытай азаматтарының екі мемлекет аумағында көлік жүргізуіне байланысты бірқатар рәсімді жеңілдетуге мүмкіндік береді. Сондай-ақ тараптар мұндай шешімнің өзара сапарларды ыңғайлы етуге ықпал ететінін атап өтті.
Аталған уағдаластық Бейжіңде өткен «Орталық Азия – Қытай» форматындағы ішкі істер және қоғамдық қауіпсіздік министрлерінің кездесуінде белгілі болды.
Қазақстанның ішкі істер министрі Ержан Сәденов Қытайға жұмыс сапары аясында ҚХР қоғамдық қауіпсіздік министрі Ван Сяохунмен кездесті. Кездесу барысында екі ел арасындағы қауіпсіздік саласындағы қазіргі ынтымақтастықтың негізгі бағыттары талқыланды.
Тараптар бірлескен жұмыстың алдағы жоспарларын да қарастырып, қауіпсіздік саласындағы өзара іс-қимылды одан әрі дамытуға қатысты пікір алмасты.
Жүргізуші куәліктерін өзара тану және айырбастау туралы уағдаластық Қазақстан мен Қытай арасындағы азаматтардың жүріп-тұруын жеңілдетуге бағытталған қадамдардың бірі болмақ.
Бұл келісімнің нақты қашан күшіне енетіні және жүргізуші куәліктерін айырбастау тәртібі туралы қосымша ақпарат кейінірек жариялануы мүмкін.
