Қазақстанға 560 млн теңге шығын келтірген күдікті Таиландта ұсталды

Таиландтың Пхукет аралындағы Патонг қаласында Қазақстанның халықаралық іздеуінде жүрген 24 жастағы азамат ұсталды. Ол виза мерзімін 185 күннен астам уақытқа асырып, ел аумағында заңсыз жүрген.

The Phuket News басылымының хабарлауынша, ер адамға жалған құжаттар дайындап, 20-дан астам жалған компания құрды деген күдік тағылған. Тергеу нұсқасына сәйкес, бұл ұйымдар ақша жылыстату және салық төлеуден жалтару мақсатында пайдаланылған.

Аталған әрекеттердің салдарынан Қазақстанға 560 миллион 833 мың 701 теңге көлемінде материалдық залал келген.

Пхукет иммиграциялық қызметінің мәліметінше, күдікті 3 қарашада Патонг қаласындағы жатақханалардың бірінен қолға түскен. Құқық қорғау органдары бөлмеге кірген кезде ер адам абдырап, жасырынатын орын іздеген.

Ұстау операциясы Қазақстан елшілігі мен Интерполдың сұрауы негізінде ұйымдастырылған. Оған Пхукет иммиграциялық қызметінің мамандары және Провинциялық полицияның 8-өңіріндегі 3-тергеу бөлімі қатысқан.

Тергеу деректеріне сүйенсек, Қазақстан азаматы Таиландқа 2026 жылғы 4 наурызда келген. Оның елде болу визасының мерзімі 2 мамырда аяқталған. Осыған байланысты оған көші-қон заңнамасын бұзды деген айып та тағылып отыр.

Қазіргі уақытта күдіктіге қатысты сотқа дейінгі тергеу амалдары жүргізілуде.

Қазақстан Республикасы Сыртқы істер министрлігі ұсталған азаматты елге қайтару мәселесі қарастырылып жатқанын растады. Ведомствоның мәліметінше, оны Қазақстанға беру рәсімі уәкілетті органдармен бірлесіп, заңнамада белгіленген тәртіппен пысықталуда.

Таиландтың көші-қон қызметі халықаралық іздеуде жүрген және елде болу мерзімін бұзған шетел азаматтарын анықтау бойынша тексерулерді жалғастырып жатыр.