USD
Қызылордада қайтарылған активтер есебінен 6,5 млрд теңгеге жаңа емхана салынады
Үкімет заңсыз иемденілген активтерді мемлекет меншігіне қайтару және оларды әлеуметтік маңызы бар жобаларға бағыттау жөніндегі Президент тапсырмасын іске асыруды жалғастыруда. Осы мақсатта Арнаулы мемлекеттік қордан Қызылорда қаласында жаңа емхана салуға және оны заманауи медициналық құрал-жабдықтармен қамтамасыз етуге 6,5 млрд теңге бөлінді.
Жаңа денсаулық сақтау нысаны қаланың теміржолдың арғы бөлігінде тұратын халыққа қызмет көрсетеді. Қазір бұл аумақта тұрғындарға 1966 жылы салынған, әбден тозығы жеткен ғимараттағы емхана қызмет көрсетіп келеді. Жаңа нысан іске қосылғаннан кейін бір ауысымда 400 адамға дейін қабылдап, 35 мыңнан астам тұрғынға алғашқы медициналық көмек көрсетуге мүмкіндік береді.
Жоба аясында емханада ересектер мен балалар бөлімшелері, жалпы тәжірибелік дәрігерлер кабинеттері, әйелдер консультациясы, күндізгі стационар және сүзгі-бокстар жұмыс істейді. Сонымен қатар диагностикалық және оңалту бөлімдері, стоматология кабинеттері, зертхана мен орталық зарарсыздандыру бөлімшесі қарастырылған.
Медициналық мекеме заманауи технологиялармен жабдықталады. Оның ішінде компьютерлік томограф, ультрадыбыстық зерттеу аппараттары, рентген құрылғылары және басқа да жоғары технологиялық медициналық жабдықтар орнатылады.
Қазіргі уақытта құрылыс алаңында шатыр плиталарын бетондау және бірінші қабаттың ішкі қабырғаларын қалау жұмыстары жүргізіліп жатыр. Құрылысты осы жылдың соңына дейін аяқтау жоспарланған.
Жалпы, 2024–2026 жылдары Арнаулы мемлекеттік қор есебінен еліміз бойынша 610 млрд теңгеге 500-ден астам әлеуметтік маңызы бар жоба қаржыландырылды. Оның ішінде денсаулық сақтау саласын дамытуға бағытталған жалпы құны 170 млрд теңгеден асатын 191 жоба жүзеге асырылып жатыр.
