USD
Қызылорда қаласындағы мұнай өңдеу кәсіпорнының аумағында ірі өрт тіркелді. Тілсіз жау мұнай өнімдері сақталған екі резервуарды шарпыған.
Төтенше жағдай Шоқай көшесінде орналасқан кәсіпорын аумағында болған. Құтқарушылардың мәліметінше, жалын әрқайсысының сыйымдылығы 60 тонна болатын екі резервуарға тараған. Оларда жалпы көлемі шамамен 120 тонна мұнай өнімі болған.
Өрт сөндіру қызметінің алғашқы жасағы оқиға орнына келген кезде екі резервуар да жалынға оранған. Сонымен қатар олардың маңында тағы үш резервуар орналасқан. Егер өрт дер кезінде ауыздықталмаса, тілсіз жаудың сол нысандарға да тарау қаупі болған.
Оқиға орнына Төтенше жағдайлар министрлігінің күштерімен қатар қалалық жедел қызметтер мен өрт сөндіру пойызы тартылды. Құтқару жұмыстарына жедел штаб жетекшілік етті.
Мамандар өрт ошағына жақын тұрған резервуарларды қызып кетуден қорғау үшін лафеттік оқпандар арқылы үздіксіз салқындатқан. Жалынды сөндіру барысында арнайы көбік қолданылды.
Құтқарушылардың жедел және үйлесімді жұмысының нәтижесінде өрттің көршілес нысандарға таралуына жол берілмеді. Осылайша маңайдағы тағы үш резервуар сақталып қалды.
Төтенше жағдай салдарынан зардап шеккендер туралы ақпарат түскен жоқ. Өрт жалпы 200 шаршы метр аумақта толықтай сөндірілді.
Өрттің шығу себебі мен келтірілген шығын көлемі анықталып жатыр.
