USD
2025 жылғы 23 маусымда президент Қасым-Жомарт Тоқаев Қазақстандағы 15 мыңнан астам сотталған азаматты қамтитын рақымшылық жариялады. Бүгін, 2 шілдеде, Ішкі істер министрлігі Қылмыстық-атқару жүйесі комитеті (ҚАЖК) алғаш болып босатылған адам туралы мәлімет берді.
Белгілі болғандай, бұл оқиға Қостанай облысында болған.
Комитет өкілдері ер адамның ұрлық жасағаны үшін жазасын өтегенін, бұрын сотталмағанын атап өтті.
Үйінде оны әйелі мен үш баласы күтіп отыр, – деді ҚАЖК өкілдері.
Сондай-ақ Қостанай облысы бойынша ҚАЖ департаментіне қарасты мекемелерде шамамен 2000 адам жазасын өтеп жатқаны айтылды.
300 сотталған азамат рақымшылыққа ілігеді. Алғашқылары босатылып та үлгерді, – деп хабарлады ІІМ ҚАЖК баспасөз қызметі.
Айта кетейік, рақымшылықпен босатылған азаматтарға жаңа өмірге бейімделу үшін қажетті көмек көрсетіледі. Мәселен, оларды жұмысқа орналастыруға, әлеуметтік байланыстарды қалпына келтіруге және қажетті құжаттарды алуға жәрдем беріледі.
2025 жылғы 11 маусымда Мәжіліс кулуарында депутат Абзал Құспан рақымшылық бюджетті үнемдеуге көмектесетінін алға тартқан.
Рақымшылық 15 мың адамға қатысты қолданылатындықтан, соның ішінде 4100 адам түрмеден босатылады деп күтілуде. Осы арқылы жылына шамамен 5 млрд теңге үнемделуі мүмкін. Бірақ бұл – алдын ала есептеулер, – деді депутат.
