USD
Семей қаласында жол инфрақұрылымын жаңартуға арналған мемлекеттік сатып алу рәсімі кезінде заң талаптарының бұзылғаны анықталды. Жобаның жалпы құны 1,8 млрд теңгені құраған.
Прокуратура жүргізген тексеру барысында мердігерлік жұмыстарды орындау мерзімі мен қаржыландыру тәртібінде сәйкессіздіктер болғаны белгілі болды. Атап айтқанда, жол жөндеу жұмыстары екі жылға жоспарланғанымен, қажетті қаржы тек бір жылдық бюджет кезеңіне қарастырылған.
Құқық қорғау органы бұл жағдай бюджет қаражатын тиімсіз пайдалану тәуекелін арттырғанын атап өтті.
Прокурорлық қадағалау шараларының нәтижесінде анықталған кемшіліктер жойылып, мемлекеттік қаражаттың тиімсіз жұмсалуына жол берілмеді. Соның арқасында 1,2 млрд теңгеден астам бюджет қаражатының негізсіз шығындалуының алдын алу мүмкін болды.
Прокуратура өкілдері мемлекеттік қаржының заңды әрі мақсатты жұмсалуын бақылау жұмыстары жалғасатынын мәлімдеді.
