Құқық қорғау органдарына пышақ жарақаты салынғаны туралы ақпарат түскеннен кейін, оқиға орнына жедел жәрдем бригадасы мен полиция қызметкерлері барды. Дәрігерлер кеуде тұсынан жарақат алған азаматқа алғашқы медициналық көмек көрсетіп, оны емдеу мекемесіне жеткізген.
Күдіктіні «Буран-405» патрульдік экипажының қызметкерлері ізін суытпай қолға түсірді. Алдын ала мәлімет бойынша, екі азамат бұған дейін де сөзге келіп, арасында жанжал болған. Кейін қайта кездескен кезде дау қайта туындап, арты пышақ қолданылған оқиғаға ұласқан.
Полиция мәліметінше, күдікті ескі нысанды бұзу жұмыстарын атқарып жүрген жұмысшылар бригадасының мүшесі болған. Ал жарақат алған азамат сол аумақтағы тұрғын үйлердің бірінде тұрады.
Қазіргі уақытта тәртіп сақшылары жанжалдың нақты себептерін анықтап, оқиғаның барлық мән-жайын тексеріп жатыр.
Алматы қалалық полиция департаментінің мәліметінше, аталған факті бойынша денсаулыққа қасақана ауыр зиян келтіру дерегімен қылмыстық іс қозғалды. Күдікті уақытша ұстау изоляторына қамалды. Тергеу барысында қылмысқа қатысты барлық дәлелдер жиналып, қолданылған заттың орналасқан жері де анықталуда.
USD
