USD
Сауд Арабиясы Умра жасауға ниетті мұсылмандар үшін бір жылға жарамды жаңа көп мәрте кіріп-шығу визасын енгізді. Енді бұл құжат иелері виза берілген күннен бастап 12 ай ішінде корольдікке бірнеше рет сапарлай алады.
Елдің Қажылық және Умра істері министрлігінің мәліметінше, жаңа виза бойынша Сауд Арабиясының аумағында болу мерзімі бір жыл ішінде 90 күннен аспауы керек. Бастама қажыларға қолайлы жағдай жасауға, сапар ұйымдастыру үдерісін жеңілдетуге және қызмет сапасын арттыруға бағытталған «Saudi Vision 2030» стратегиясы мен «Pilgrim Experience» бағдарламасы аясында жүзеге асырылып отыр.
Жаңа визаны рәсімдеу үшін қажыларға Nusuk Umrah платформасы арқылы ресми аккредиттелген оператор ұсынатын Умра қызметтері пакетін сатып алу қажет. Аталған жүйе арқылы виза рәсімделіп қана қоймай, қонақүй, көлік және әуе билеттері де брондалады. Сонымен қатар сапар алдында қажылар Умра рәсімін орындауға арналған электронды рұқсат алуы тиіс.
Қажы елден шыққаннан кейін виза уақытша тоқтатылады. Келесі сапар алдында барлық талаптар сақталған жағдайда құжатты қайта пайдалануға болады. Алайда жыл сайынғы негізгі қажылық кезеңінде бұл визаның қолданылуына шектеу қойылады.
Euronews мәліметінше, 2026 жылдың басынан бері Сауд Арабиясы Умра визасы арқылы 931,5 мыңнан астам шетелдік қажыны қабылдаған. Бұл көрсеткіш өткен жылдың осы кезеңімен салыстырғанда 22,5 пайызға жоғары. Қажылардың басым бөлігі Пәкістан, Индонезия және Ирак азаматтары болған.
Умра мен қажылықтың басты айырмашылығы — Умраны мұсылмандар жылдың кез келген уақытында өз еркімен орындай алады. Ал қажылық Зүл-хиджа айының нақты белгіленген күндерінде өтеді және оған мүмкіндігі бар мұсылмандар үшін өмірінде бір рет орындау парыз саналады.
Сауд Арабиясының Бас статистика басқармасы (GASTAT) жариялаған деректерге сәйкес, 2025 жылы корольдікке қажылық жасау үшін 1,5 миллионнан астам шетелдік келген. Ел тұрғындарын қоса есептегенде, қажылыққа қатысушылардың жалпы саны 1,6 миллионнан асқан.
