Тоқаев Теміртауда министрлерді қытай тілін білмегені үшін әзілмен түйреп өтті
Қазақстан президенті Қасым-Жомарт Тоқаевтың Қарағанды облысына жұмыс сапары кезінде қызықты сәт тіркелді. Теміртаудағы Qarmet кәсіпорнында қытайлық ACRE компаниясының өкілдерімен кездескен Мемлекет басшысы аудармашының көмегінсіз қытай тілінде сөйлесті.
Осы кезде президенттің жанында премьер-министрдің орынбасарлары мен бірнеше министр тұрған. Алайда олардың шетелдік серіктестер арасындағы әңгімені түсінбегені байқалды.
Журналист Әділ Балтабаев жариялаған видеода Тоқаевтың аудармашыны біраз уақыт тоқтатып, қытайлық делегациямен өз тілінде сөйлескенін көруге болады.
Кейін Мемлекет басшысы аудармашыға сөзді аударуды жалғастыруды ишарамен білдірген. Осы сәтте үкімет мүшелерінің әңгімені түсінбей тұрғанын аңғарған Тоқаев әзілге басып, министрлерге қатысты мысқыл аралас пікір айтқан.
«Бұлардың бәрі қытайшаға судай», – деген президенттің сөзі видеоға түсіп қалған.
Осылайша, Теміртаудағы кездесуде Тоқаевтың қытай тілін еркін меңгергені және министрлерге бағытталған әзілі әлеуметтік желі қолданушыларының назарын аударды.
USD