Қазақстанда браконьерлікпен күрес күшейді: 119 қылмыстық іс сотқа жолданды
Қазақстанда табиғат қорғау заңнамасын бұзу деректері бойынша құқық қорғау органдары бірқатар заңсыз әрекетті анықтады. Ішкі істер министрлігінің мәліметінше, биылғы жылдың алғашқы тоғыз айында браконьерлік және басқа да экологиялық құқықбұзушылықтарға қатысты 119 қылмыстық іс сотқа жіберілген.
Осы кезеңде заңсыз балық аулау фактілері де тіркелген. Тәртіп сақшылары жалпы салмағы 23 тоннадан асатын балықты тәркіледі. Оның ішінде 1,5 тоннаға жуығы бекіре тұқымдас балықтар. Сонымен қатар заңсыз жолмен алынған 11 келіге жуық уылдырық анықталды.
Браконьерлерден 361 киік мүйізі, заңсыз балық аулауға арналған 29 шақырымға жуық тор және 345 аңшылық қаруы тәркіленген. Табиғат қорғау заңнамасын бұзғаны үшін 13 200 адам әкімшілік жауапкершілікке тартылды.
Министрлік Солтүстік Қазақстан облысында анықталған тағы бір дерекке назар аударды. Ақжар ауданындағы ауылдардың бірінде полиция қызметкерлері шамамен бір тонна балық тиелген «Газель» көлігін тапқан.
Көліктен балықтан бөлек, екі қайық пен олардың қозғалтқыштары да табылған. Қазіргі уақытта тәртіп сақшылары өнімнің қайдан ауланғанын және оны тасымалдауға қажетті рұқсат құжаттарының бар-жоғын тексеріп жатыр.
ІІМ мәліметінше, табиғат байлығын заңсыз пайдалануға қарсы күрес әрі қарай жалғасады.
USD