Жамбыл облысында ақшаға байланысты жанжал атысқа ұласып, екі адам ауруханаға түсті

Жамбыл облысының Бурыл ауылында тұрғындар арасындағы келіспеушілік атыспен аяқталды. Оқиға кезінде бірнеше адам зардап шегіп, екеуі медициналық мекемеге жатқызылды.

Алдын ала мәлімет бойынша, жанжал ақшаға қатысты туындаған. Куәгерлердің айтуынша, ауыл тұрғындарының бірі ұялы телефон сатқанымен, ақшасын ала алмаған. Кейін қарызды талап ету үшін оның үйіне төрт адам келген. Алайда кездесу барысында жағдай ушығып, оларға оқ атылған.

Оқиғадан кейін зардап шеккендер дәрігерлердің көмегіне жүгінген. Медициналық тексеру нәтижесінде екі адам үйіне жіберілсе, тағы екеуі ауруханаға жатқызылған.

Құқық қорғау органдары атысқа қатысы бар адамдарды қолға түсірді. Қазіргі уақытта олар уақытша ұстау изоляторына қамалған.

Жамбыл облыстық полиция департаменті басшысының орынбасары Байжан Байгелдінің хабарлауынша, аталған дерек бойынша қылмыстық іс қозғалған.

«Аталған факті бойынша қылмыстық іс қозғалды. Қылмысқа қатысы бар адамдар уақытша ұстау изоляторына қамалды», – деді ол.

Оқиғаның мән-жайы анықталып жатыр.