Самара – Шымкент тасжолында қалған 15 тәжікстандық Ырғыздағы мешітке орналастырылды

Самара – Шымкент бағытындағы тасжолда жолын жалғастыра алмай қалған 15 шетел азаматына көмек көрсетілді. Тәжікстаннан Ресейге қарай бет алған жолаушылар Ырғыз ауылындағы мешітке уақытша орналастырылды.

Ішкі істер министрлігінің мәліметінше, шетелдіктер Van Hool маркалы автобуспен сапарға шыққан. Жолда қалған 15 адамның алтауы – әйел, төртеуі – бала, бесеуі – ер адам. Барлығы Тәжікстан Республикасының азаматтары.

Оқиға орнына патрульдік полиция қызметкерлері мен Ырғыз ауданының төтенше жағдайлар қызметінің мамандары барған. Олар жолаушыларды қауіпсіз жерге жеткізіп, ауыл кіреберісіндегі мешітке орналастырған.

«Патрульдік полиция Ырғыз ауданының төтенше жағдайлар қызметі мамандарымен бірлесіп, жолаушыларды қауіпсіз жерге орналастырды. Олар Ырғыз ауылының қиылысында орналасқан мешітке тұрақтады», – деп хабарлады ІІМ.

Ведомствоның хабарлауынша, жолаушылардың өмірі мен денсаулығына қауіп төніп тұрған жоқ. Олар медициналық көмекке мұқтаж емес екенін айтып, дәрігерлердің көмегінен бас тартқан.