Ташкентте уланған қарағандылық балалар ауруханадан шығып, Қазақстанға оралды

Өзбекстан астанасы Ташкентте футбол жарысына қатысу үшін барған Қарағанды ​​қаласының балалары елге аман-есен оралды. Бұған дейін тамақтан уланып, медициналық мекемеге жеткізілген қазақстандықтар ем қабылдап, ауруханадан шығарылған.

Қазақстанның Өзбекстандағы елшілігінің хабарлауынша, зардап шеккендерге жергілікті дәрігерлер қажетті медициналық көмекті уақытылы көрсеткен. Сонымен қатар екі елдің денсаулық сақтау министрліктері балалар мен ересектердің Қазақстанға қауіпсіз оралуын ұйымдастыруға атсалысқан.

Дипломатиялық өкілдік Өзбекстандағы медициналық мекемелермен және мемлекеттік органдармен тұрақты байланыста болып, емделушілерге қатысты консулдық және ұйымдастырушылық мәселелерді шешуге көмектескен.

Қазақстан елшілігі науқастарды емдеуге қатысқан медицина қызметкерлеріне ризашылығын білдірді.

«Қазақстан елшілігі №5 қалалық клиникалық жұқпалы аурулар ауруханасының басшылығы мен медицина қызметкерлеріне, осы іске атсалысқан барлық қызметкерге жылдам көмек көрсеткені үшін шынайы алғысын білдіреді», – делінген ресми хабарламада.

Еске салайық, бұған дейін Қарағандыдан Ташкентке барған 18 адамның уланып, ауруханаға түскені белгілі болған. Олардың арасында 12 бала мен алты ересек адам болған. Жалпы футбол жарысына Қазақстаннан 95 адам барған.