USD
Ақтөбеде жас әйелді бұрынғы күйеуі өлтірді деген күдікке ілінді
Ақтөбеде әйел адамның өліміне қатысты қайғылы оқиға қоғамда қызу талқыланып жатыр. Әлеуметтік желіде марқұмның бұрынғы күйеуінің қолынан қаза тапқаны туралы ақпарат тарады.
Марқұмның туыстарының бірі Threads әлеуметтік желісінде жазба жариялап, отбасына түскен ауыр қайғы туралы хабарлаған. Оның айтуынша, әйелдің артында кішкентай қызы қалған.
Жарияланымда туысы болған жағдайдың отбасы үшін үлкен қасірет екенін айтып, марқұмның жақындарына көңіл айту білдірген.
Осы ақпаратқа байланысты облыстық Полиция департаменті түсініктеме берді. Құқық қорғау органдары аталған дерек бойынша қылмыстық іс қозғалғанын және күдіктінің ұсталғанын растады.
Ақтөбе облысы Полиция департаменті бастығының орынбасары Әсет Қалиевтің мәліметінше, ер адам уақытша ұстау изоляторына қамалған. Алдын ала тергеу нұсқасына сәйкес, қайғылы жағдай бұрынғы ерлі-зайыптылар арасындағы тұрмыстық жанжалдан кейін болған.
Полиция өкілінің айтуынша, бұған дейін бұрынғы ерлі-зайыптылар арасындағы жанжалдарға қатысты құқық қорғау органдарына ешқандай арыз-шағым немесе хабарлама түспеген.
Қазіргі уақытта тергеу амалдары жалғасып жатыр. Полиция қызметкерлері оқиғаның барлық мән-жайын анықтап, қылмыстың себептерін тексеруде.
