USD
Жамбыл облысында ер адамды атып өлтірді: күдікті ұсталды
Жамбыл облысы Тұрар Рысқұлов ауданындағы Луговое ауылында қайғылы оқиға орын алды. 1 тамыз күні түнгі сағат 03:00 шамасында белгісіз адамдар ер адамға оқ атып, оның өліміне себеп болған.
Марқұмның туыстарының айтуынша, бұл іске жергілікті қылмыстық топтың қатысы болуы мүмкін деген болжам бар. Қаза болған азаматтың әпкесі күдіктілердің шамамен 22 жаста екенін айтқан. Сондай-ақ отбасы мүшелері бұған дейін марқұмға бірнеше рет қысым көрсетіліп, қорқыту әрекеттері болғанын жеткізді.
Марқұмның жақындары қылмыстың толық әрі әділ тергелуін талап етіп отыр. Олар кінәлі адамдардың анықталып, заң алдында жауап беруін сұрайды. Сонымен қатар отбасы өкілдері Мемлекет басшысына үндеу жасап, тергеу барысын бақылауға алуды өтінді.
Қаза болған азаматтың артында жары, ұлы мен қыздары қалды. Ал қарт ата-анасы жалғыз перзентінен айырылып отыр.
Жамбыл облысының полиция департаменті аталған дерек бойынша қылмыстық іс қозғалғанын хабарлады. Қазіргі таңда іс Қазақстан Республикасы Қылмыстық кодексінің «Кісі өлтіру» бабы бойынша тергеліп жатыр.
Полиция мәліметінше, күдікті анықталып, уақытша ұстау изоляторына қамалған. Қазір тергеу аясында оқиғаның барлық мән-жайын анықтауға бағытталған қажетті шаралар жүргізілуде.
Тергеу құпиясына байланысты қосымша ақпарат әзірге жарияланбайды.
