USD
Астанадағы жасанды интеллект олимпиадасына Кабо-Верде оқушылары да қатысып жатыр
Астанада жасанды интеллект бойынша халықаралық олимпиада өтіп жатыр. Байқауға әлемнің 106 елінен 500-ге жуық жас қатысып, өз білімдері мен жобаларын таныстыруда.
Сайысқа қатысушы мемлекеттердің қатарында Кабо-Верде де бар. Ел командасының мүшесі Педро Душ Сантуш Қазақстанға алғаш рет келгенін айтты. Оның сөзінше, Кабо-Верде үшін жасанды интеллект саласы әлі де жаңа бағыт болғанымен, бұл салаға қызығушылық артып келеді.
«Біздің елде ұлттық даму үшін жасанды интеллектіні қолдану енді қарқын алып келеді. Біз – осы бағытта өз жобаларын әзірлеп жатқан алғашқы командалардың біріміз. Сонымен қатар, техникалық мамандар мен инженерлер саны да көбейіп келеді», – деді ол.
Кабо-Верде командасы халықаралық додада жақсы нәтиже көрсетіп, өз елінің атын танытуды мақсат етіп отыр. Қатысушылар үшін бұл алғашқы ірі халықаралық жарыс болғандықтан, олар бәсекеден тәжірибе жинап қайтуды маңызды деп санайды.
Педро Душ Сантуш олимпиаданың ұйымдастырылу деңгейін жоғары бағалап, Қазақстандағы қонақжайлыққа ерекше тоқталды. Оның айтуынша, қатысушыларға барлық қажетті жағдай жасалған.
Соңғы уақытта Кабо-Верде әлем назарын көбірек аудара бастаған. Бұған футболдан әлем чемпионатындағы ел құрамасының тарихи жетістігі де әсер етті. Шағын аралдық мемлекеттің танымалдығын арттырған басты тұлғалардың бірі – қақпашы Жозезинью Диаш (Возинья).
40 жастағы қақпашы Испания құрамасымен кездесуде қарсыластың жеті қауіпті соққысына тосқауыл қойып, команданың 0:0 есебін сақтап қалуына үлкен үлес қосты. Осы ойыннан кейін Возиньяға деген қызығушылық күрт өсіп, Кабо-Верде туралы халықаралық ақпарат құралдарында жиі жазыла бастады.
Педро Душ Сантуштың айтуынша, елге келетін туристер саны да артып келеді. Кабо-Верде бұл бағытта арнайы бағдарламалар әзірлеп, туристік мүмкіндіктерін дамытуға көңіл бөліп отыр.
Олимпиадаға қатысып жатқан өзге командалар да жарысқа жоғары дайындықпен келген. Өзбекстан құрамасының мүшесі Аслидин Абдурахимов Қазақстанға екінші рет келгенін айтып, мұндай халықаралық жобалар тәжірибе алмасуға мүмкіндік беретінін атап өтті. Ал Қытай өкілдері байқауға тыңғылықты дайындалғанын жеткізді.
