USD
Павлодарда жаңа туған сәбиін 800 мың теңгеге сатпақ болған әйелге үкім шықты
Павлодарда жаңа туған қызын ақшаға беруге әрекет жасаған әйел сотталды. Сот оны кәмелетке толмағандар саудасына кінәлі деп танып, бес жылға бас бостандығынан айырды. Алайда жазаны өтеу бес жылға кейінге шегерілді.
Сот материалдарына сәйкес, 2002 жылы туған Түркістан қаласының тұрғыны жүктілік кезінде дүниеге келмеген баласын сатуды жоспарлаған. Бұған материалдық қиындықтар себеп болған.
Әйел «ВКонтакте» әлеуметтік желісіндегі бала асырап алуға ниетті адамдарға арналған қауымдастықтардың біріне хабарландыру орналастырған. Кейін ол жаңа туған қызды 800 мың теңгеге беруге келісетін сатып алушы тапқан.
2026 жылғы 28 наурызда әйел Павлодар облыстық №1 перинаталдық орталығында дені сау қыз баланы дүниеге әкелген.
Одан кейін құқық қорғау органдарының жедел-іздестіру шаралары барысында күдіктінің әрекеті әшкереленген. Операция кезінде сатып алушы рөліндегі адамға нөмірлері алдын ала белгіленген ақша берілген.
31 наурызда Павлодардағы пәтерлердің бірінде әйел нәрестені медициналық құжаттарымен бірге сатып алушыға тапсырған. Осы кезде ол 100 мың теңге көлемінде ақша алған.
Павлодар қаласының кәмелетке толмағандардың істері жөніндегі мамандандырылған ауданаралық соты әйелді Қылмыстық кодекстің 135-бабы 1-бөлігі бойынша кінәлі деп таныды. Оған орташа қауіпсіздік мекемесінде өтеумен бес жылға бас бостандығынан айыру жазасы тағайындалды.
Сонымен қатар Қылмыстық кодекстің 74-бабы негізінде жазаны орындау бес жыл мерзімге кейінге қалдырылды.
Прокуратура балаларды заңсыз сатуға немесе беруге байланысты кез келген әрекет қылмыстық жауапкершілікке әкелетінін еске салды. Ведомство мұндай қылмыстардың алдын алу мен жолын кесу құқық қорғау органдарының тұрақты бақылауында екенін атап өтті.
