USD
Алматыда пышақ қолданылған жанжалдан кейін алты адам ұсталды
Алматыда болған жанжал кезінде бір адам жарақат алған. Оқиғаға байланысты полиция алты жасты ұстады.
Қалалық полиция департаментінің мәліметінше, 26 шілдеге қараған түні «102» арнасына Ақсай шағынауданында қолында пышағы бар бір топ жастың жүргені туралы хабар түскен. Оқиға орнына келген тәртіп сақшылары жанжал барысында ер адамның пышақ жарақатын алғанын анықтаған.
Полиция қызметкерлері жедел іздестіру шараларын жүргізіп, оқиғаға қатысы болуы мүмкін алты адамды ұстады. Күдіктілерді «Буран-308» экипажы анықтаған. Ұсталғандардың кейбірінің киімдерінен қанға ұқсас іздер табылып, тергеу үшін қажетті заттай дәлелдер тәркіленді.
Барлық ұсталған азаматтар мән-жайды анықтау және қажетті тергеу әрекеттерін жүргізу үшін Әуезов аудандық полиция басқармасына жеткізілді.
Қазіргі уақытта полиция жанжалдың қалай болғанын, оған қатысушылардың әрқайсысының әрекетін және пышақ жарақатын салуға нақты кімнің қатысы бар екенін анықтап жатыр.
Алматы қаласының полиция департаменті аталған дерек бойынша сотқа дейінгі тергеу жалғасып жатқанын хабарлады.
