4,5 млрд теңге шығын келтірген: медициналық техниканы отандық өнім ретінде өткізген күдікті Грузиядан экстрадицияланды
Қазақстанда медициналық жабдықтарды шетелден әкеліп, отандық өнім ретінде мемлекеттік мекемелерге сатқан азамат Грузиядан елге қайтарылды. Тергеу мәліметінше, оның заңсыз әрекеттері салдарынан мемлекетке 4,5 млрд теңгеден астам залал келген.
Бас прокуратураның мәліметінше, күдікті мемлекеттік сатып алуларға қатысу үшін заңсыз жолмен отандық тауар өндіруші мәртебесін иеленген. Ол мемлекеттік органдарға медициналық жабдықтардың Қазақстан аумағында өндірілетіні туралы жалған ақпарат ұсынған.
Алайда іс жүзінде елімізде мұндай техника өндірілмеген. Жабдықтар шетелден бөлшектелген күйде жеткізіліп, кейін құрастырылған. Соған қарамастан, олар мемлекеттік медициналық ұйымдарға қазақстандық өнім ретінде ұсынылып, тендерлер арқылы сатылған.
Осылайша, күдікті отандық өндірушілерге берілетін артықшылықтарды пайдаланып, мемлекеттік сатып алулардан пайда тапқан. Кейін қылмыстық қудалаудан жалтару мақсатында Қазақстаннан кетіп, Грузия аумағына жасырынған.
Биыл наурыз айында ол Грузияда ұсталды. Бас прокуратураның сұрауы негізінде Бас прокуратура мен Ұлттық қауіпсіздік комитетінің қызметкерлері, сондай-ақ Қазақстанның Грузиядағы елшілігінің көмегімен күдіктіні елге экстрадициялады.
Қазіргі уақытта азамат тергеу изоляторына қамалды. Оған тағылған айыптар дәлелденген жағдайда, мүлкін тәркілеумен бірге 10 жылға дейін бас бостандығынан айырылуы мүмкін.
Бас прокуратураның хабарлауынша, жыл басынан бері Грузиядан Қазақстанға іздеуде жүрген жеті адам экстрадицияланған. Олардың бесеуі ұрлық және өзге де мүліктік қылмыстарға байланысты іздеуде болған.
USD