USD
Қазақстанда өңіраралық қоныс аударуды қолдау бағдарламасына бірқатар өзгеріс енгізілді. Енді басқа аймаққа көшетін азаматтарға жеке баспана сатып алу үшін 7 млн теңгеге дейін қаржылай көмек қарастырылған.
Мемлекеттік қолдау арнайы тұрғын үй сертификаты түрінде беріледі. Қоныс аударушылар бұл қаражатты жаңа тұрғылықты жерінен үй сатып алуға пайдалана алады.
Бағдарлама аясында тұрғындарға тек баспана мәселесінде ғана емес, басқа да бағыттар бойынша көмек көрсетіледі. Атап айтқанда, мемлекет:
- көшіп баруға байланысты шығындарды өтейді;
- жалдамалы тұрғын үй ақысы мен коммуналдық төлемдердің бір бөлігін субсидиялайды;
- жаңа өңірде жұмысқа орналасуға жәрдемдеседі.
Бұған дейін жобаға негізінен жұмыссыз азаматтар қатысса, қазір оның мүмкіндігі кеңейтілді. Енді еңбек нарығында сұранысқа ие мамандар, сондай-ақ шаруа және фермер қожалықтарының басшылары мен қызметкерлері де мемлекеттік қолдауға өтініш бере алады.
Қоныс аударуды жоспарлаған азаматтар көшуге қолайлы өңірлер, бос жұмыс орындары және қажетті мамандықтар туралы ақпаратты migration.enbek.kz порталы арқылы ала алады. Сондай-ақ өтінімді онлайн түрде жіберуге мүмкіндік бар.
Өңіраралық қоныс аудару бағдарламасы 2017 жылдан бері еңбек күші жетіспейтін аймақтарға тұрғындарды тарту мақсатында жүзеге асырылып келеді. Осы уақыт ішінде жобаға 73,9 мың адам қатысып, олардың 31 мыңнан астамы тұрақты жұмысқа орналасты.
