USD
Ақмола облысында ірі жол-көлік оқиғасы болып, екі адам қаза тапты. Оқиға «Астана – Петропавл» тасжолының 157-шақырымында, Бұланды ауданы аумағында тіркелген.
Полицияның алдын ала мәліметінше, Көкшетау бағытымен қозғалып келе жатқан Audi Q8 автокөлігі жол жөндеу жұмыстарын жүргізіп жатқан MAN жүк көлігіне соғылған.
Соқтығыс салдарынан жеңіл көлік жүргізушісі мен оның бір жолаушысы алған жарақаттарынан оқиға орнында көз жұмды. Тағы бір жолаушы түрлі дене жарақаттарымен ауруханаға жеткізілді.
Аталған дерек бойынша сотқа дейінгі тергеу басталып, апаттың нақты себептерін анықтау үшін тиісті сараптамалар тағайындалды. Қазір мамандар жол-көлік оқиғасының барлық мән-жайын зерттеп жатыр.
Ақмола облысының полиция департаменті жүргізушілерге жол ережесін сақтаудың маңыздылығын еске салып, жылдамдықты жол жағдайына қарай таңдауға және жөндеу жұмыстары жүріп жатқан аумақтарда барынша сақ болуға шақырды.
