USD
Алдағы үш тәулікте Қазақстанның басым бөлігінде ауа райы құбылып, жаңбыр жауып, найзағай ойнайды. Бұл туралы «Қазгидромет» РМК алдағы күндерге арналған болжамында хабарлады.
Синоптиктердің мәліметінше, атмосфералық фронттардың әсерінен елдің көптеген өңірінде өткінші жауын-шашын күтіледі. Кей жерлерде желдің екпіні күшейіп, бұршақ жаууы ықтимал. Солтүстік-батыс, солтүстік және шығыс аймақтарда нөсер жаңбыр жаууы болжанып отыр.
Ал еліміздің оңтүстік және оңтүстік-шығыс өңірлерінде ауа райы жауын-шашынсыз болады. Бұған Иран аумағынан келетін құрғақ әрі ыстық ауа массалары әсер етеді.
Метеорологтардың болжамынша, республика бойынша ауа температурасы жалпы жоғарылай түседі. Дегенмен батыс, солтүстік-батыс және солтүстік облыстарда аптап ыстықтың беті қайтып, 1 тамызда күндізгі ауа температурасы +25…+35 градус аралығында болады.
Ал орталық, шығыс және оңтүстік-шығыс өңірлерде күндіз ауа температурасы +33…+41 градусқа дейін көтерілсе, оңтүстік облыстарда +35…+44 градусқа дейін ыстық сақталады.
