USD
Қазақстанда жойылып кеткен Тұран жолбарысын тарихи мекеніне қайта жерсіндіру жобасы кезең-кезеңімен жүзеге асырылып жатыр. Бүгінде «Іле-Балқаш» мемлекеттік табиғи резерватында алты Амур жолбарысы жаңа ортаға бейімделу жұмыстарынан өтуде.
Бұл бастама еліміздегі ең ауқымды экологиялық жобалардың бірі саналады. Оның басты мақсаты – бір кездері қазақ даласын мекендеген Тұран жолбарысын қайта жерсіндіріп қана қоймай, табиғи экожүйенің тепе-теңдігін қалпына келтіру.
Жоба аясында «Іле-Балқаш» мемлекеттік табиғи резерватының аумағында жыртқыштың тіршілігіне қолайлы жағдай жасалып, қорек базасын нығайту және биоалуантүрлілікті сақтау бағытында кешенді жұмыстар жүргізілуде.
Экология және табиғи ресурстар министрлігінің мәліметінше, 2024 жылы Нидерландтан, ал 2026 жылы Ресей Федерациясынан Амур жолбарыстары жеткізілген. Қазір арнайы қоршалған вольер кешенінде жалпы алты жыртқыш бейімделу кезеңінен өтуде. Мамандар бұл кезеңді Тұран жолбарысын тарихи мекеніне қайта қоныстандыру жолындағы маңызды белес деп бағалайды.
Ведомствоның атап өтуінше, жолбарыс – табиғаттағы биологиялық тепе-теңдіктің маңызды көрсеткіші. Оның мекен етуі экожүйенің саулығын айқындайды және табиғи ортаның тұрақтылығын сақтауға ықпал етеді.
Министрлік табиғатты қорғау ісі – келер ұрпақ алдындағы ортақ міндет екенін атап өтіп, Тұран жолбарысының болашақта қайтадан қазақ даласының символына айналатынына сенім білдірді.
