АҚШ-тағы танымал телеарна қазақ азаматына басшылық қызмет сеніп тапсырды
АҚШ-та тұратын қазақстандық журналист Талғат Алман мансабында жаңа белеске көтерілді. Ол Буффалодағы ABC 7 телеарнасына Executive Reporter (аға тілші) қызметіне тағайындалды. Отандасымыз қуанышты жаңалығын әлеуметтік желідегі парақшасында бөлісті.
Жаңа лауазымында Талғат Алман жаңалықтар бөлімінің жұмысына жетекшілік етіп, журналистер мен продюсерлердің қызметін үйлестіреді. Сондай-ақ ақпараттық материалдардың сапасы мен жедел жариялануына жауап береді. Бұған қоса, ол репортаждар дайындап, зерттеу журналистикасы бағытындағы жұмысын жалғастырмақ.
Журналист жаңа қызметке тағайындалуына байланысты өзіне сенім артқан телеарна басшылығына алғысын білдірді.
«Телеарнадағы алғашқы басшылық қызметке кіріскенімді ерекше қуанышпен хабарлаймын. Жаңа міндетімді абыроймен атқарып, көрсетілген сенімді ақтау үшін бар күшімді саламын. Сәттілік тілеп қойыңыздар, достар», – деп жазды ол.
Айта кетейік, Буффалодағы ABC 7 телеарнасы алғаш рет 1958 жылғы 30 қарашада эфирге шыққан. Биыл ақпарат құралдарының тарихы 68 жылға жуықтады. Бүгінде телеарна ABC ұлттық тележелісінің жергілікті филиалы саналады және E.W. Scripps медиакомпаниясының құрамына кіреді. Компания оны 2014 жылы өз меншігіне алған.
ABC 7 телеарнасы Батыс Нью-Йорк өңіріндегі маңызды оқиғаларды тұрақты түрде жариялап келеді. Көрермендерге жергілікті жаңалықтармен қатар ауа райы болжамы, спорттық ақпараттар және қоғамдық-танымдық бағдарламалар ұсынылады.
Телеарнаның Eyewitness News жаңалықтар қызметі Буффало тұрғындарына бірнеше онжылдықтан бері ақпарат таратып келеді. Енді осы ұжымның басшылық құрамындағы жауапты міндеттердің бірі қазақстандық журналист Талғат Алманға сеніп тапсырылды.
USD