Атырау облысында тікелей эфирде өзін «террорист» деп атаған екі әйел ұсталды
Атырау облысында әлеуметтік желі арқылы тікелей эфирге шыққан екі әйел полиция назарына ілікті. 38 және 39 жастағы азаматшалардың бірі эфир барысында өзін 20 жылдан бері террорист екенін айтып, Ұлттық қауіпсіздік комитетінің қызметкерлері оны жақсы танитынын мәлімдеген.
«20 жылдан бері террористпін. Бүкіл КНБ мені таниды. Өздері қарап отыр бізді, тізімде бірінші тұрмын», — деген әйел тікелей эфир кезінде.
Осы оқиғадан кейін екі азаматшаны да полиция қызметкерлері бөлімшеге жеткізген.
Полиция департаментінің мәліметінше, әйелдерге қатысты үш әкімшілік іс қозғалған. Олар ұсақ бұзақылық жасады, құқыққа қайшы контент таратты және қоғамдық орындарда адамның жеке басын анықтауға кедергі келтіретін киім киді деген деректер бойынша жауапқа тартылмақ.
Қазіргі уақытта әкімшілік құқық бұзушылық туралы материалдар соттың қарауына жіберілген.
Сонымен қатар, әйелдермен профилактикалық жұмыс жүргізіліп, теологтың түсіндіру әңгімесіне қатысқан. Полиция өкілдері оларға заң талаптары мен қоғамдық тәртіп ережелерін түсіндірген.
USD