USD
Ақтауда блогер жарнамалаған тауарларға қатысты алаяқтық ісі тергеліп жатыр
Маңғыстау облысында әлеуметтік желі арқылы тауар сатуға қатысты алаяқтық дерегі бойынша екі адам тергеуге алынды. Полицияның мәліметінше, күдіктілердің бірі Қытайдан тұрмыстық техника мен премиум санаттағы ыдыс-аяқтарды арзан бағамен жеткізу туралы жарнама таратқан.
Қылмыстық іс материалдарына сәйкес, тауарларды жарнамалау үшін 360 мыңнан астам оқырманы бар Instagram парақшасының иесі тартылған. Жарнаманы көрген азаматтар көрсетілген байланыс нөмірлері арқылы хабарласып, тапсырыс үшін жеке кәсіпкердің есепшотына ақша аударған.
Алайда тапсырыс берушілерге арналған қаражат тауарларды жеткізуге жұмсалмай, жеке қажеттіліктерге пайдаланылған. Тергеу барысында ыдыс-аяқ пен тұрмыстық техникаға ақша аударып, зардап шеккен азаматтар анықталды.
Осы факті бойынша Қазақстан Республикасы Қылмыстық кодексінің 190-бабы, яғни алаяқтық бойынша қылмыстық іс қозғалды. Күдіктілердің бірі ұсталып, уақытша ұстау изоляторына қамалды.
Қазіргі уақытта құқық қорғау органдары оқиғаның барлық мән-жайын анықтап, ықтимал өзге де жәбірленушілерді іздестіріп жатыр.
Бейресми деректерде іске қатысы болуы мүмкін блогер ретінде 29 жастағы Салтанат Аманқосова аталады. Алайда оның іске қатысына қатысты түпкілікті құқықтық баға тергеу нәтижесінде берілуге тиіс.
Полиция азаматтарды әлеуметтік желідегі жарнамаларға сүйеніп, тауар сатып аларда сатушының сенімділігін тексеруге, төлем деректемелеріне назар аударуға және күмәнді шоттарға ақша аудармауға шақырды.
