USD
Ақтөбеде үш адам 2 миллион теңге бопсалады деген күдікке ілінді
Ақтөбе облысында полиция қызметкерлері бопсалау дерегі бойынша үш күдіктіні ұстады. Құқық қорғау органдарына арызданған тұрғын бірнеше адамның өзінен ақша талап етіп, қорқытып жүргенін хабарлаған.
Облыстық полиция департаментінің мәліметінше, жедел-іздестіру шаралары барысында күдіктілер анықталып, полиция бөлімшесіне жеткізілген. Алдын ала тергеу деректеріне сәйкес, күдіктілер 2025 жылдың соңында жәбірленушінің ұялы телефонын иемденіп алған. Кейін осы жағдайды пайдаланып, одан 2 миллион теңге талап еткен.
Полиция қызметкерлері күдіктілерді ақша алу кезінде ұстаған. Аталған факті бойынша Қылмыстық кодекстің бопсалау бабымен сотқа дейінгі тергеу басталды.
Сонымен қатар күдіктілердің бірінің тұрғылықты жеріне жүргізілген тінту кезінде травматикалық қару, пышақ және 16 калибрлі аңшылық қаруға арналған оқ-дәрілер табылып, тәркіленді.
Қазіргі уақытта алынған заттарға сараптама тағайындалды. Зерттеу нәтижесіне қарай оларға құқықтық баға беріледі.
