USD
Ерлан Қарин тойдағы даулы уағызға қатысты пікір білдірді
Президент Әкімшілігі басшысының бірінші орынбасары Ерлан Қарин әлеуметтік желіде тараған, той үстінде айтылған даулы сөздерге қатысты пікір білдірді.
Оның айтуынша, әйелдерді кемсіту, өнер адамдары мен музыка саласына қатысты жағымсыз пікірлер айту қазақ қоғамының дәстүрлі құндылықтарына сәйкес келмейді. Қарин мұндай көзқарастардың ұлттық танымға жат екенін атап өтті.
«Қазақстан — зайырлы мемлекет. Елдегі басты құндылықтардың бірі — Конституция және заң үстемдігі. Қоғамдағы қарым-қатынастар діни шектеулермен емес, қолданыстағы заңдармен реттелуі керек», — деді Ерлан Қарин.
Ол мәдениет пен өнерді дінге қарсы қоюды дұрыс емес деп бағалады. Мемлекеттің бағыты білім, ғылым, өнер және мәдениетті дамытуға негізделгенін айтты.
Қариннің пікірінше, көпшілік алдында өзге адамдарды кемсітуге, белгілі бір көзқарасты күшпен таңуға жол берілмеуі керек. Қоғамда өзара сыйластық пен әдеп нормалары жоғары бағалануы қажет.
Президент Әкімшілігі басшысының бірінші орынбасары ұлттық құндылықтар мен елдің қоғамдық ұстанымдарына қайшы келетін әрекеттерге азаматтар бірге қарсы тұруы керек екенін атап өтті.
