Threads желісінде әскердегі зорлық туралы жалған жазба жариялап, ақша жинаған астаналық сотталды
Threads платформасында әскери қызмет кезінде зорлық көргенін айтып, жұрттан қаржылай көмек сұраған 23 жастағы Астана тұрғыны сот үкімімен жауапқа тартылды.
Ішкі істер министрлігінің мәліметінше, азамат әлеуметтік желіде шындыққа жанаспайтын ақпарат таратып, жеке пайдасы үшін ақша жинауға әрекет жасаған.
Тергеу деректеріне сәйкес, биыл ақпан айында ол анонимді түрде жазба жариялап, әскерде жүрген кезінде жыныстық зорлық-зомбылыққа ұшырағанын мәлімдеген. Сонымен қатар өміріне қауіп төніп тұрғанын айтып, шетелге шығу үшін қаражат қажет екенін жазған. Жазбада ақша аударуға арналған банк шотының деректері де көрсетілген.
Алайда жүргізілген тексеру барысында бұл мәліметтердің жалған екені анықталған. Құқық қорғау органдары ер адамның ешқашан әскери қызметте болмағанын және жариялаған оқиғасының шындыққа сәйкес келмейтінін анықтады.
Ақша жинау үшін ол өзінің жағдайынан бейхабар 17 жастағы танысының банк шотын пайдаланған. Екі күн ішінде аталған есепшотқа 15-тен астам аударым түскен.
Тергеу барысында азамат жалған ақпаратты тек қаржылай пайда табу мақсатында таратқанын мойындаған. Сот оның әрекетіне құқықтық баға беріп, тиісті жаза тағайындады.
