Балқаш қаласының жаңа әкімі тағайындалды
Балқаш қаласының әкімі қызметіне Саян Мұратұлы тағайындалды. Жаңа қала басшысын тұрғындар активіне Қарағанды облысының әкімі Ермағанбет Бөлекпаев таныстырды.
Кездесу барысында облыс әкімі Балқаштың әлеуметтік-экономикалық дамуына қатысты негізгі міндеттерді атап өтті. Оның айтуынша, қаладағы инженерлік инфрақұрылымды жаңғырту, коммуналдық қызметтердің сапасын жақсарту, абаттандыру жұмыстарын күшейту және әлеуметтік жобаларды тиімді жүзеге асыру басты бағыттардың бірі болуы тиіс.
Сондай-ақ Балқаш көлінің туристік әлеуетін дамытуға ерекше мән берілетіні айтылды. Бұл бағытта жағалау аумақтарын абаттандыру, туристік инфрақұрылымды жетілдіру, инвестиция тарту және жаңа демалыс орындарын қалыптастыру жұмыстары жалғасады.
Саян Мұратұлы мемлекеттік қызмет саласында 2015 жылдан бері еңбек етіп келеді. Еңбек жолын Балқаш қаласының тұрғын үй-коммуналдық шаруашылығы, жолаушылар көлігі және автомобиль жолдары бөлімінде абаттандыру, жол және коммуналдық шаруашылық бағыттары бойынша маман ретінде бастаған.
Кейін Қарағанды облысының энергетика және тұрғын үй-коммуналдық шаруашылық басқармасында сумен жабдықтау және су бұру саласында түрлі қызметтер атқарды. 2022-2024 жылдары Ақтоғай ауданы әкімінің орынбасары болды.
Одан кейін Қарағанды облысының құрылыс, сәулет және қала құрылысы басқармасы басшысының орынбасары қызметін атқарып, 2025 жылдың тамыз айына дейін осы басқарманы басқарды.
Жаңа әкім өз сөзінде көрсетілген сенім үшін алғыс білдіріп, Балқаш қаласының дамуына бар күшін салатынын айтты. Оның сөзінше, қаладағы негізгі міндеттердің бірі – тұрғындардың өмір сүру сапасын арттыру, инфрақұрылымды дамыту және өңірдің туристік мүмкіндіктерін тиімді пайдалану.
Саян Мұратұлы Балқаштың әлеуетін жақсы білетінін айтып, қаланы тұрғындар үшін жайлы, қонақтар үшін тартымды әрі инвестицияға қолайлы аймаққа айналдыру бағытында жұмыс істейтінін атап өтті.
