Астана маңындағы жол апатынан жараланған полиция капитаны ауруханада көз жұмды
Астана – Петропавл тасжолында болған жол-көлік оқиғасынан ауыр жарақат алған полиция капитаны Данияр Таев қайтыс болды. Тәртіп сақшысы бүгін ауруханада көз жұмған.
Қайғылы жағдай 3 қараша күні болған. Сол уақытта полиция қызметкерлері патрульдік автокөлікпен жол жөндеу жұмыстарына арналған арнайы техниканы бастап келе жатқан.
Алдын ала мәлімет бойынша, осы бағытта қозғалып келе жатқан JAC маркалы көліктің жүргізушісі жылдамдықты асырып, алдыңғы көлікпен қауіпсіз арақашықтықты сақтамаған. Салдарынан жол апаты орын алып, полиция капитаны ауыр жарақат алған.
Жараланған қызметкер шұғыл түрде медициналық мекемеге жеткізілгенімен, дәрігерлер оның өмірін сақтап қала алмады.
Оқиғаға байланысты қылмыстық іс қозғалды. JAC көлігін басқарған жүргізуші ұсталып, уақытша ұстау изоляторына қамалған. Қазіргі уақытта тергеу амалдары жүргізіліп жатыр.
Облыстық Полиция департаментінің хабарлауынша, Ішкі істер министрлігінің басшылығы мен жеке құрамы марқұмның отбасына және жақындарына қайғыра көңіл айтты.
USD