USD
Елорда маңындағы ат-спорт клубында болған жазатайым оқиға адам өлімімен аяқталды. Бір айдан астам уақыт бойы комада жатқан 33 жастағы астаналық Жазира Қызылбаева 13 тамызда ауруханада қайтыс болды.
Қайғылы жағдай шілде айының басында Целиноград ауданындағы «Атлант» ат-спорт клубында болған. Марқұмның туыстарының айтуынша, Жазира атқа мінуге тәжірибелі болған. Алайда серуен кезінде мінген аты кенеттен үркіп, оны тоқтату мүмкін болмаған. Соның салдарынан әйел аттан құлап, ауыр бас-ми жарақатын алған.
Оқиғадан кейін ол ауруханаға жеткізіліп, дәрігерлер оның өмірін сақтап қалуға тырысты. Алайда науқас ұзақ уақыт есін жимай, комада жатқан. 13 тамызда оның қайтыс болғаны белгілі болды.
Осы жағдайға байланысты Ақмола облысының полиция департаменті қылмыстық істің саралануы өзгеретінін хабарлады.
Полиция мәліметінше, қылмыстық іс 6 шілдеде қауіпсіздік талаптарына сай келмейтін қызмет көрсету фактісі бойынша тіркелген. Қазір оқиғаның барлық мән-жайын анықтауға бағытталған тергеу амалдары жүргізіліп жатыр.
Тергеу нәтижесінде ат-спорт клубындағы қауіпсіздік талаптарының сақталуы және қайғылы оқиғаға әкелген себептерге құқықтық баға берілмек.
