USD
Атырауда алтыншы сынып оқушысы мектепке пышақ алып келген: оқиғаға буллинг себеп болуы мүмкін
Атыраудағы №14 мектепте алтыншы сынып оқушысы мен оның қатарластары арасында жанжал туындады. Оқиға кезінде оқушылардың бірі мектепке пышақ алып келіп, өзіне тиісіп, мазақтаған балаларды қорқытқан. Абырой болғанда, ешкім зардап шеккен жоқ.
Жергілікті «Ақ Жайық» басылымының хабарлауынша, оқиға 21 қазанда болған. Алдын ала мәліметтерге сәйкес, жанжалға сыныптастарының балаға көрсеткен қысымы себеп болуы мүмкін.
Басылым дереккөзінің мәліметінше, оқушы өзіне тиісіп жүрген балаларға қарсы шығып, мектепке пышақ әкелген. Ол өзін ренжіткен оқушыларға ескерту жасап, оларды жазалайтынын айтқан көрінеді. Жағдайдан хабардар болған балалар мұғалімге жеткізген. Осыдан кейін мектепке полиция қызметкерлері мен оқушылардың ата-аналары шақырылған.
Алдын ала ақпарат бойынша, полиция қызметкерлері жанжалға қатысқан балалардың ата-аналарымен профилактикалық әңгіме жүргізген.
Атырау облыстық полиция департаменті алтыншы сынып оқушылары арасында жанжал болғанын және олардың бірінде пышақ болғанын растады. Сонымен қатар ведомство оқушылар арасында пышақтасу болды деген ақпаратты жоққа шығарды.
Оқиға салдарынан ешкім жарақат алмаған. Қазіргі уақытта жағдайға қатысты мән-жайлар анықталуда.
Бұл жағдай мектептердегі буллингтің алдын алу, балалар арасындағы қарым-қатынасты бақылау және оқушылардың қауіпсіздігін қамтамасыз ету мәселелерінің маңызын тағы да көрсетті.
