USD
Атыраудағы «Гранд Атырау» тұрғын үй кешенінде лифт апатқа ұшырап, бірнеше адам зардап шекті. Оқиға кешеннің «Б» блогында болған.
Қала әкімдігінің мәліметінше, лифт үшінші қабаттан төмен қарай құлаған кезде оның ішінде төрт тұрғын болған.
Оқиғадан кейін үш адам жедел жәрдем көлігімен ауруханаға жеткізіліп, дәрігерлердің қарауынан өтті. Алдын ала ақпарат бойынша, олардың жағдайы қанағаттанарлық.
Тағы бір тұрғын медициналық көмекке жүгінуден бас тартқан.
Оқиғадан кейін жағдай қала әкімінің бақылауына алынды. Әкімдік қазіргі уақытта болған жағдайдың барлық мән-жайы анықталып жатқанын хабарлады.
Лифттің қандай себеппен құлағаны әзірге белгісіз. Қазір жауапты мамандар апаттың себептерін анықтап, тиісті тексеру жұмыстарын жүргізіп жатыр.
