Бұрынғы танысы бойжеткенді інісінің көзінше пышақтап өлтірген

Семейде 19 жастағы Дильяра Сәлімбаева қаза тапты. Оқиға 21 қыркүйек күні кешкі уақытта болған. Марқұмның туыстарының айтуынша, қызды бұрын таныс болған 24 жастағы жігіт басқа адамдар арқылы кездесуге шақырған.

Марқұмның әпкесі Парасат Айбекова әлеуметтік желідегі жазбасында күдікті қызға бірнеше жерінен пышақ жарақатын салғанын және оқиға кезінде оның туған інісі болғанын жазды. Оның сөзінше, бойжеткен жедел жәрдем келгенге дейін көп қан жоғалтып, оқиға орнында көз жұмған.

Абай облысының полиция департаменті адам өлтіру фактісі бойынша қылмыстық іс қозғалғанын хабарлады. Күдікті ұсталып, уақытша ұстау изоляторына қамалды. Полицияның мәліметінше, ол 24 жастағы жергілікті тұрғын. Алдын ала ақпарат бойынша, күдікті мен марқұм бұрын таныс болған.

Қылмыстық істің мән-жайы тергеу барысында анықталады.