USD
Қазақстанда жұмыспен қамту көрсеткіштері жақсарып келеді. 2026 жылдың 1 шілдесіндегі мәлімет бойынша, жыл басынан бері елімізде 249 598 адам еңбекпен қамтылған.
Еңбек және халықты әлеуметтік қорғау саласындағы мемлекеттік бағдарламалардың нәтижесінде тұрақты жұмысқа орналасқан азаматтардың саны айтарлықтай өсті. Биылғы алты айда 96 415 қазақстандық тұрақты жұмыс тапқан. Бұл өткен жылдың сәйкес кезеңімен салыстырғанда 30 мыңнан астам адамға көп.
Мамандардың айтуынша, бүгінде жұмысқа орналасқан азаматтардың басым бөлігі ұзақ мерзімді еңбек келісімшарттары бойынша қызметке орналасып, тұрақты жалақы мен әлеуметтік кепілдіктерге ие болып отыр.
Сонымен қатар еңбек нарығында уақытша жұмыспен қамту үлесі азайып келеді. Егер бұған дейін уақытша жұмыс орындары елеулі үлесті құраса, қазіргі таңда тұрақты жұмыспен қамтуға басымдық берілуде. Жыл басынан бері уақытша жұмысқа орналасқандар саны 115 960 адамнан 76 953 адамға дейін төмендеген.
Ведомство бұл өзгерістерді еңбек нарығын дамытуға бағытталған кешенді шаралардың нәтижесімен байланыстырады. Атап айтқанда, жұмыс берушілермен әріптестік кеңейтіліп, Enbek.kz электрондық еңбек биржасының мүмкіндіктері жетілдірілуде. Сонымен қатар еңбек нарығының сұранысына сәйкес кәсіптік даярлау бағдарламалары іске асырылып, азаматтарды жұмыспен қамтуға бағытталған түрлі тетіктер қолданылып жатыр.
Ресми дерекке сәйкес, 2026 жылдың бірінші тоқсанының қорытындысында елімізде жұмыспен қамтылғандар саны 9 миллион 392 мың адамға жеткен. Жалдамалы қызметкерлер саны шамамен 150 мың адамға артқан. Ал жұмыссыздық деңгейі 4,5 пайыз болса, жастар арасындағы жұмыссыздық 3 пайыз деңгейінде сақталған.
Министрлік алдағы уақытта да сапалы жұмыс орындарын көбейтуге, еңбек өнімділігін арттыруға және азаматтардың кәсіби дағдыларын жетілдіруге басымдық берілетінін атап өтті. Негізгі мақсат – қазақстандықтарды ресми еңбек қатынастары рәсімделген, тұрақты табыс әкелетін және лайықты еңбекақы төленетін жұмыс орындарымен қамтамасыз ету.
Мемлекеттік органдардың пікірінше, тұрақты жұмыспен қамтуды арттыру халықтың тұрмыс сапасын жақсартуға, ел экономикасының тұрақты дамуына және әлеуметтік тұрақтылықты сақтауға ықпал ететін маңызды факторлардың бірі болып қала береді.
