USD
Ақтөбе облысының Хромтау қаласында жоғалып кеткен ер адамның өліміне қатысты қылмыстық іс бойынша сот үкімі заңды күшіне енді. Негізгі айыпталушы 11 жылға, ал қылмысты жасырған екінші тұлға 4 жылға бас бостандығынан айырылды.
Іс материалдарына сәйкес, 2024 жылғы 11 қазанда жергілікті тұрғын полицияға жұбайының бір аптаға жуық уақыттан бері үйіне оралмағанын және байланысқа шықпай жатқанын хабарлаған. Осыдан кейін тәртіп сақшылары жедел түрде іздестіру жұмыстарын бастап, арнайы жедел-тергеу тобын құрды.
Тергеу барысында полицейлер жоғалған азаматтың жүрген ортасын толық зерттеп, туыстары, көршілері, таныстары мен әріптестерінен жауап алған. Сонымен қатар оның болуы мүмкін барлық орындар тексеріліп, жиналған ақпарат мұқият сараланған.
Жедел іздестіру шараларының нәтижесінде құқық қорғау органдары ер адамның екі танысына күдік келтірген. Олардың тұрғылықты мекенжайында жүргізілген тінту кезінде қылмысқа қатыстылығын дәлелдейтін заттай айғақтар табылды. Сол кезде жоғалған азаматтың басы мұздатқыштың ішінен анықталған.
Тергеушілердің мәліметінше, жиналған дәлелдер күдіктілердің кінәсін толық растаған. Кейін олар жасаған қылмыстарын мойындаған.
Қылмыстық іс толық әрі жан-жақты тергеліп, белгіленген мерзімде сотқа жолданды. 2025 жылдың ақпанында сот үкім шығарып, негізгі айыпталушыны адам өлтіргені үшін 11 жылға бас бостандығынан айырды. Ал екінші сотталушы аса ауыр қылмысты жасырғаны үшін кінәлі деп танылып, 4 жылға сотталды.
