USD
Нью-Йоркте ер адам Бруклин көпірінен секіріп, аман қалды
Нью-Йоркте жексенбі күні ерекше жағдай тіркелді. 44 жастағы ер адам Бруклин көпірінің ең биік бөлігіне көтеріліп, төменге секірген. Оқиға куәгерлерінің бірі болған жағдайды видеоға түсіріп алған.
Полиция мәліметінше, оқиға шамамен сағат 14:30 кезінде болған. Ер адам көпірдің Манхэттен жақтағы мұнарасына шығып, бірнеше туды ілгеннен кейін киімін шешіп, қауіпті әрекетке барған.
Оқиға орнына келген Нью-Йорк полициясының арнайы қызмет өкілдері ер адамды райынан қайтаруға тырысқанымен, ол көп ұзамай суға секіріп кеткен.
Куәгерлер түсірген бейнежазбадан ер адамның суға құлаған сәтте қолында киімге немесе сөмкеге ұқсас затты ұстап тұрғаны байқалады. Ол затты ауа кедергісін азайту үшін пайдаланған болуы мүмкін.
Ер адамды Нью-Йорк полициясының су патруль қызметкерлері судан алып шыққан. Кейін ол Bellevue ауруханасына жеткізілді. Дәрігерлер оның жағдайын тұрақты деп бағалады.
Полиция өкілдерінің айтуынша, көпірге ілінген тулардың арасында Қазақстанның мемлекеттік туы болған. Сонымен қатар мағынасы әзірге анықталмаған жазулары бар мата да табылған.
Бруклин көпірінің екі негізгі мұнарасының биіктігі шамамен 84,7 метрді құрайды.
