USD
Қазақстандық альпинист әрі музыкант, Қалибек Қуанышбаев атындағы Қазақ ұлттық музыкалық-драма театрының актері Әлібек Қайырбек ерекше экспедиция жасады. Ол Памир тау жүйесіндегі 6148 метр биіктікте орналасқан Раздельная шыңын бағындырып, өзімен бірге Қазақстан Республикасының Конституциясы мен қазақтың ұлттық аспабы домбыраны алып шықты.
Бұл сапар «Әлем шыңдарындағы домбыра» халықаралық мәдени-патриоттық жобасы аясында жүзеге асырылды. Жобаның негізгі мақсаты — Қазақстанның рухани мұрасын, ұлттық өнерін және мәдени құндылықтарын әлемдік деңгейде таныту.
Әлібек Қайырбек бұған дейін де бірнеше құрлықтағы биік шыңдарға көтеріліп, сол жерлерде домбырамен қазақ күйлерін орындаған. Оның шығармашылық-альпинистік сапарлары Еуропа, Африка, Гималай және Тянь-Шань таулы аймақтарын қамтыған.
Раздельная шыңында да альпинист қазақтың күй өнерін дәріптеп, домбырамен күй орындады. Сонымен қатар, Қазақстанның басты құқықтық құжаты — Конституцияны биік шыңға көтерді.
Айта кетейік, 2025 жылы Ата Заңның 30 жылдығына орай Әлібек Қайырбек Қазақстан тарихында алғаш рет Конституцияны Гималайдағы Айленд-Пик шыңына шығарған болатын. Биыл ол бұл бастамасын жалғастырып, Қазақстанның басты құжатын Памир тауының биігіне жеткізді.
