USD
Павлодар облысының Ақтоғай ауданында орналасқан «AQTOGAI MILK» кәсіпорнында болған қайғылы оқиғадан кейін қаза тапқандардың отбасылары мен зардап шеккен қызметкерге жан-жақты қолдау көрсету шаралары қолға алынды.
Еске салайық, өндірістік жабдықтарға техникалық қызмет көрсету кезінде болған жазатайым оқиға салдарынан алты адам көз жұмып, тағы бір жұмысшы ауыр халде ауруханаға жеткізілген болатын.
Оқиғаның себептері мен мән-жайын анықтау үшін Үкіметтің тапсырмасымен арнайы мемлекеттік комиссия құрылды. Оның құрамына Еңбек және халықты әлеуметтік қорғау, Төтенше жағдайлар, Ішкі істер, Денсаулық сақтау, Экология және табиғи ресурстар, Ауыл шаруашылығы министрліктерінің, сондай-ақ жергілікті атқарушы органдардың өкілдері кірді.
Қазіргі уақытта аталған факті бойынша Қылмыстық кодекстің 156-бабының 4-бөлігіне сәйкес сотқа дейінгі тергеу амалдары жүргізіліп жатыр. Тергеу барысы Үкіметтің ерекше бақылауында. Еңбек және халықты әлеуметтік қорғау министрі Асқарбек Ертаев оқиға орнына барып, марқұмдардың туыстарымен кездесіп, көңіл айтты.
Компания қаза болған қызметкерлердің отбасыларына бірқатар әлеуметтік міндеттемелерді қабылдады. Атап айтқанда, марқұмдардың барлық банктік несиелері толық өтеліп, олардың еңбекақысы жыл соңына дейін отбасыларына төленетін болады.
Сонымен қатар, қаза тапқан қызметкерлердің кәмелетке толмаған балаларына 18 жасқа толғанға дейін материалдық қолдау көрсетіліп, олардың білім алуына қажетті барлық шығынды жұмыс беруші өз мойнына алады.
Өндірістегі апаттан аман қалған қызметкерге де қажетті медициналық көмек көрсетіліп жатыр. Компания оның емделуі мен оңалтуына байланысты барлық шығындарды толық қамтамасыз ететінін мәлімдеді.
