USD
Қазгидромет мамандары Қазақстанда қазан айында қалыптасатын ауа райына қатысты болжамын жариялады. Синоптиктердің мәліметінше, ай жалпы алғанда жылы болады деп күтілуде. Ал жауын-шашын көлемі көп өңірде климаттық нормаға жақын болады.
Айдың алғашқы күндерінде еліміздің басым бөлігінде күн жылынып, ауа температурасы +15…+25°С аралығында сақталады. Алайда кейін Солтүстік циклонның ықпалы күшейіп, республика бойынша жаңбыр мен қар жаууы мүмкін. Желдің жылдамдығы кей жерлерде 15–28 м/с-қа дейін жетеді. Солтүстік өңірлерде бұрқасын соғып, тұман, көктайғақ және үсік жүру ықтималдығы бар.
Арктикалық ауа массаларының енуіне байланысты температура уақытша төмендейді. Батыс пен солтүстік-батыста түнде -6…+5°С, күндіз +2…+11°С шамасында болады. Солтүстік, шығыс және орталық өңірлерде түнгі температура -1…-6°С-қа дейін төмендеп, күндіз 0…+8°С аралығында қалыптасады.
Оңтүстік және оңтүстік-шығыс облыстарда ауа райы салыстырмалы түрде жылырақ болады. Мұнда түнде 0…+5°С, күндіз +10…+15°С күтіледі. Таулы аймақтарда түнгі температура -2…-10°С-қа дейін төмендеуі мүмкін.
Дегенмен, салқын кезең ұзаққа созылмайды. Қазанның алғашқы онкүндігінің екінші жартысында Орта Азия мен Жерорта теңізінің шығыс бөлігінен жылы ауа массалары келеді. Соның әсерінен елдің көп бөлігінде күндіз +15…+20°С-қа дейін жылынуы ықтимал. Ал оңтүстік-батыс пен оңтүстік өңірлерде температура +18…+28°С-қа дейін көтеріледі.
Айдың екінші және үшінші онкүндіктерінде ауа райы құбылмалы болады. Батыс пен солтүстік-батыста күндізгі температура бастапқыда +18…+28°С болса, кейін +10…+20°С-қа дейін төмендеуі мүмкін. Солтүстік, орталық және шығыста күндіз +15…+23°С-тан +3…+13°С-қа дейін өзгереді.
Оңтүстік өңірлерде де температура бірқалыпты болмайды: күндіз +15…+23°С аралығынан +20…+30°С-қа дейін көтерілуі мүмкін. Кейбір кезеңдерде түнде -1…-6°С, күндіз +10…+15°С шамасында болады.
Жалпы алғанда, қазан айында Қазақстанның басым бөлігінде орташа ауа температурасы климаттық нормадан 1–2°С жоғары болады деп болжануда. Ал Шығыс Қазақстан, Павлодар және Абай облыстарының солтүстік-шығыс бөлігінде көрсеткіштер климаттық нормаға жуық болады.
Синоптиктердің болжамынша, ай ішінде түсетін жауын-шашын мөлшері республиканың көп бөлігінде көпжылдық орташа көрсеткіштер шамасында сақталады.
