USD
Құрылтай цифрландыру және жасанды интеллект бойынша тыңдауларға сарапшыларды шақырады
Құрылтай цифрландыру және жасанды интеллект мәселелеріне арналған желтоқсанда өтетін тыңдауларға IT саласының мамандарын, бизнес өкілдерін және түрлі бағыттағы сарапшыларды бірлесіп жұмыс істеуге шақырып отыр.
Құрылтайдың цифрландыру, инновациялар және ғылым комитетінің төрағасы Дархан Ахмедиевтің айтуынша, негізгі мақсат – елдегі цифрландыру деңгейін талқылаумен шектелмей, экономикаға нақты әсер ететін жобаларды анықтау.
Оның пікірінше, цифрлық технологияларды енгізудің нәтижесі нақты көрсеткіштерден көрінуі керек. Атап айтқанда, жаңа жобалар өндіріс көлемін арттыруға, шығындарды азайтуға, кәсіпорындардың табысын көбейтуге және қазақстандық өнімнің экспорттық мүмкіндіктерін кеңейтуге бағытталуы тиіс.
Алдағы тыңдаулар барысында экономиканың әр саласында кездесетін нақты мәселелерге қандай технологиялар мен шешімдер тиімді болатыны қарастырылады.
Сарапшылар мен бизнес өкілдерінен жұмыс топтары құрылады
Осы мақсатта бизнес өкілдері, ғалымдар, IT мамандары және салалық сарапшылардың қатысуымен арнайы жұмыс топтарын құру жоспарланып отыр.
Олар әр сектор үшін өзекті мәселелерді саралап, цифрлық технологиялардың көмегімен шешуге болатын бағыттарды анықтайды.
Сонымен қатар ұсынылатын жобалар бірнеше санат бойынша қаралмақ. Бір бөлігін кәсіпорындардың өз күшімен жүзеге асыру мүмкіндігі бағаланса, кейбір бастамаларға мемлекеттік қолдау қажет болуы мүмкін. Ал жекелеген жобаларды іске асыру үшін заңнамаға өзгерістер енгізу қажеттігі қарастырылады.
Құрылтай жұмысына шетелде тұратын, бірақ цифрландыру, IT және басқа да тиісті салаларда тәжірибесі бар қазақстандық мамандар да қатыса алады.
Ұйымдастырушылар сарапшылар мен бизнес өкілдерін өз ұсыныстары мен нақты жобаларын ортаға салып, алдағы тыңдаулардың мазмұнын қалыптастыруға атсалысуға шақырып отыр.
