USD
Щучьеде ерлі-зайыпты қаза тапқан өртке байланысты 39 жастағы ер адам ұсталды
Ақмола облысының Щучинск қаласында жеке тұрғын үй өртеніп, оның ішінде болған ерлі-зайыпты қаза тапты. Полицияның алдын ала мәліметінше, өртті жергілікті тұрғын қасақана қойған.
Оқиға Бурабай ауданына қарасты Щучинск қаласында болған. Төтенше жағдайлар департаментінің мәліметінше, тілсіз жау жеке тұрғын үйдің шамамен 90 шаршы метр аумағын шарпыған.
Өрт сөндірушілер оқиға орнына жетіп, жалынды ауыздықтаған. Өртті сөндіру жұмыстарына 16 құтқарушы мен төрт арнайы техника жұмылдырылды.
Үйді тексеру кезінде құтқарушылар 1968 жылы туған ер адам мен әйел адамның денесін тапқан.
Бастапқыда мамандар өрттің шығу себебін анықтауға кіріскен. Кейін полиция жүргізген жедел-тергеу шаралары барысында оқиғаның қасақана жасалған болуы мүмкін екені анықталған.
«Алдын ала мәлімет бойынша, 39 жастағы жергілікті тұрғын тұрғын үйді қасақана өртеген. Соның салдарынан үйде болған ерлі-зайыпты қаза тапқан. Күдікті ұсталып, уақытша ұстау изоляторына қамалды», – деп хабарлады Ақмола облысы Полиция департаментінің баспасөз қызметі.
Аталған факті бойынша қылмыстық іс қозғалып, сотқа дейінгі тергеу басталды. Қазір полиция өрттің нақты себептері мен оқиғаның барлық мән-жайын анықтап жатыр.
