USD
Түркістанда 9 айлық сәби екі батарейка жұтып, шұғыл ота жасалды
Түркістан облысында 9 айлық сәби байқамай екі батарейка жұтып қойған. Баланың ата-анасы бұл туралы бірден білмеген. Біраз уақыттан кейін сәбидің дене қызуы көтеріліп, жүрегі айнып, жағдайы нашарлаған соң оны Түркістан облыстық балалар ауруханасына жеткізген.
Медициналық тексеру барысында дәрігерлер баланың ағзасынан екі батарейка бар екенін анықтаған. Олардың біреуі өңеште тұрып қалған. Осыған байланысты мамандар шұғыл түрде операция жасау туралы шешім қабылдаған.
«Рентген жасады. Асқазанын қараса, екі батарейка тұр. Шұғыл түрде ота жасау керек екенін айтты. Операция шамамен 1,5 сағатқа созылды», – деді баланың анасы.
Ота кезінде эндоскопия мамандары өңеште тұрып қалған батарейканы алып тастаған. Ал екінші бөгде зат ішек жолдарына өтіп кеткендіктен, оны хирургиялық жолмен алу қажет болмаған. Дәрігерлер сәбидің жағдайын бақылап, батарейканың өздігінен шығуын күткен.
Түркістан облыстық балалар ауруханасының дәрігер-хирургы Бердалы Тасанбидің айтуынша, кейін ішекте орналасқан батарейка табиғи жолмен шыққан.
«Баланың ағзасынан екі батарейка анықталды. Оның біреуі өңеште тұрып қалған. Екіншісі ішек жолдарында орналасқан. Эндоскопия дәрігері шақырылып, фиброгастродуоденоскопия әдісі арқылы өңештегі бөгде зат алынды. Ал ішектегі батарейка динамикалық бақылауда болды. Қазіргі таңда ол өздігінен шықты», – деді дәрігер.
Мамандардың айтуынша, әсіресе түйме тәрізді батарейкалар кішкентай балалар үшін аса қауіпті. Егер мұндай зат өңеште тұрып қалса, қысқа уақыт ішінде ағзаның ішкі тіндерін зақымдауы мүмкін.
9 айлық сәби үш тәулік бойы жансақтау бөлімінде ем қабылдаған. Қазір баланың жағдайы жақсарған, ол дәрігерлердің бақылауында.
