USD
Қазақстанда майлы дақылдардан рекордтық өнім күтілуде
Қазақстанда биыл майлы дақылдарды жинау көлемі рекордтық деңгейге жетуі мүмкін. Ауыл шаруашылығы министрлігінің болжамынша, науқан қорытындысында 5 млн тоннадан астам өнім алу жоспарланып отыр.
Бұл туралы Үкімет отырысында ауыл шаруашылығы вице-министрі Азат Сұлтанов мәлімдеді. Оның айтуынша, биыл майлы дақылдардың егіс көлемі 5,2 млн гектарға дейін артқан.
Қазіргі уақытта шаруалар 2,4 млн гектар алқаптағы жұмысты аяқтап, одан 2,4 млн тонна майлы дақыл жинаған. Вице-министр егін жинау жұмыстарының өткен жылмен салыстырғанда жоғары қарқынмен жүріп жатқанын атап өтті.
Жалпы биыл Қазақстан бойынша 24,2 млн гектар егістік алқапты жинау көзделген. Оның ішінде 15,6 млн гектардан астам жерге дәнді және дәнді-бұршақты дақылдар егілген.
Дәнді дақылдарды жинау барысында да айтарлықтай көлемге қол жеткізілді. Қазірдің өзінде 13,5 млн гектар немесе жалпы алқаптың 83 пайызы орылып, 19,9 млн тонна астық бастырылған. Орташа өнімділік гектарына 14,7 центнерді құрап отыр.
Министрлік биылғы астық түсімі көпжылдық орташа көрсеткіштен жоғары болады деп күтуде. Ведомствоның бағалауынша, алынатын өнім ел ішіндегі азық-түлік, мал азығы және тұқым қорына қажеттілікті қамтамасыз етуге мүмкіндік береді. Сонымен бірге экспорт көлемін сақтауға жағдай жасалмақ.
Ауыл шаруашылығындағы егіс құрылымында да өзгеріс байқалады. Биыл дәнді дақылдардың үлесі 72 пайыздан 66 пайызға дейін қысқарған. Ал майлы дақылдардың үлесі керісінше 13 пайыздан 18 пайызға дейін артқан.
