USD
Үш елге астық экспорттау схемасы: БҚО-да бес адам күдікке ілінді
Батыс Қазақстан облысында Қаржылық мониторинг агенттігінің департаменті астықты заңсыз импорттап, кейін оны Қазақстанда өндірілген өнім ретінде шетелге шығаруға байланысты схеманы анықтады.
ҚМА мәліметінше, тергеу барысында бес адамның Өзбекстан, Ауғанстан және Тәжікстанға астық жеткізуге қатысы бар екені анықталған. Күдікке ілінгендер өнімнің шығу тегін қазақстандық ретінде көрсетіп, оны Орталық және Оңтүстік Азия нарықтарына экспорттаған деген болжам бар.
Тергеу нұсқасына сәйкес, Қазақстан аумағы арқылы жалпы құны 11,2 млрд теңге болатын шамамен 130 мың тонна астық өткізілген. Өнімнің негізгі бөлігі аталған үш мемлекетке жөнелтілген.
ҚМА дерегінше, күдіктілер экспорт операцияларын жүзеге асыру үшін «Bakery Nan», «KazGrano», «Perfect Seed», «Weizen» және «Golden Grain Kazakhstan» компанияларын пайдаланған.
Схема салдарынан «ҚТЖ – Жүк тасымалы» ЖШС-не транзиттік төлемдер бойынша 1 млрд теңгеден астам шығын келгені айтылды.
Бұдан бөлек, тергеу мәліметіне сәйкес, күдіктілер салық берешегі мен кредиторлар алдындағы міндеттемелерін өтеуден жалтару мақсатында бақылауындағы экспорттаушы компаниялардың қаражатын үлестес ұйымдардың шоттарына аударған. Кейін бұл компанияларға қатысты банкроттық рәсімдерін бастауға әрекет жасаған.
Аталған әрекеттерден мемлекетке келтірілген залал көлемі ҚМА тарапынан 1,2 млрд теңге деп бағаланып отыр.
Қылмыстық іс бойынша бес адам күдікті деп танылған. Тергеу жалғасып жатыр, істің барлық мән-жайы анықталуда. Күдіктілердің кінәсі соттың заңды күшіне енген үкімімен ғана анықталады.
