USD
«Чампи» тайфуны Тайвань мен Жапонияға қауіп төндірді: жүздеген рейс тоқтатылды
Шығыс Азияда қуатты «Чампи» тайфунының жақындауына байланысты Тайвань мен Жапонияда әуе қатынасына шектеулер енгізілді. Тайвань билігі қолайсыз ауа райына байланысты 125 рейстің тоқтатылғанын хабарлады.
Reuters агенттігінің мәліметінше, Тынық мұхитында қалыптасқан дауыл бір кезеңде супертайфун деңгейіне дейін күшейген. Қазіргі уақытта оның қуаты біршама төмендегенімен, желдің жылдамдығы сағатына 227 шақырымнан асып отыр.
Метеорологтердің болжамы бойынша, тайфун жұма күні кешке Тайваньның солтүстік-шығыс жағалауына жақындап, одан әрі Қытай жағалауы мен Жапонияның оңтүстік бөлігіне қарай жылжуы мүмкін. Мамандар дауылдың әсері екі күнге дейін созылуы ықтимал екенін ескертті.
Тайвань президенті Лай Циндэ тұрғындарды қауіпсіздік шараларын алдын ала қабылдауға шақырды. Ол әсіресе таулы аймақтар мен жағалауға бармауға кеңес берді. Әзірге халықты жаппай эвакуациялау туралы хабарланбаған. Синоптиктер жағалаудағы толқын биіктігі алты метрден асуы мүмкін екенін ескертті.
Дауылдың әсері Жапонияның Окинава префектурасына қарасты Йонагуни аралында да сезілуі мүмкін. Осыған байланысты Japan Airlines, ANA және Skymark әуе компаниялары бейсенбіден жексенбіге дейінгі кезеңде 100-ден астам рейсті тоқтату туралы шешім қабылдаған.
Мамандар тұрғындарға ауа райына қатысты ресми ескертулерді қадағалап, қажетсіз сапарлардан бас тартуға кеңес береді.
